کەمخەوی دەبێتەهۆی وشکبوونەوەی جەستە پ‌د‌ف چاپکردن پۆستی ئەلیکترۆنی
سێ شەممە, 04 کانونی یەکەم 2018 18:01

پزیشکانی ئەمریکی لە نوێترین توێژینەوەیاندا رایدەگەیێنن، ئەو کەسانەی کەمخەون، بەهۆی تێکچوونی هاوسەنگی هۆرمۆنەکان، بەدرێژایی رۆژ زۆرتر تووشی وشکبوونەوەی جەستە دەبن.
پزیشکە ئەمریکییەکان لە زانکۆی پەنسیلڤانیا لە توێژینەوەکەدا، لە کاریگەری ماوە و کواڵێتی خەوتنییان لەسەر تەندروستی بەگشتی کۆڵیوەتەوە و ئەنجامی توێژینەوەکەشیان لە جۆرناڵی (Sleep) بڵاوکردوەتەوە.
د. ئەشێر رۆسینجێر، پرۆفیسۆر لە زانکۆی پەنسیلڤانیا و یەکێک لە ئەنجامدەرانی توێژینەوەکە دەڵێت، " کاتێک کەسێک بۆماوەی شەش کاژێر یان کەمتر دەخەوێت، هاوسەنگی هۆرمۆنی ( ڤازۆپرێسین) لە جەستەیدا تێکدەچێت و سەرەنجام وشکبوونەوەی جەستەی لێدەکەوێتەوە و هەرئەمەش وادەکات کەسەکە هەست بە بێهێزی و شەکەتبوون بکات. "
توێژینەوەکەی پزیشکە ئەمریکییەکان لەسەر 20 هەزار کەس ئەنجامدراوە، دوای شیکردنەوەی داتاکان، پزیشکە توێژەرەکان بۆیاندەرکەوتووە، ئەوانەی شەوانە شەش کاژێر یان کەمتر دەخەون، مەترسی وشکبوونەوەی جەستەیان بەرێژەی %69 زیاترە بەبەراورد بەوانەی شەوانە 7-8 کاژێر دەخەون.
پزیشکە ئەمریکییەکان رێنماییدەدەن شەوانە 7-8 کاژێر بخەون، و بەدرێژایی رۆژ ئاو خواردنەوە لەبیرنەکەن.