بۆچی په‌روین سێ شوویكرد؟؟ پ‌د‌ف چاپکردن پۆستی ئەلیکترۆنی
یەک شەممە, 26 ئاب 2018 20:44

هێشتاكه‌ ته‌مه‌نی بیست و هه‌شت ساڵه‌، تا بڵێی شۆخ‌و شه‌نگ‌و جوانه‌، مرۆڤ كه‌ ته‌ماشای بكات نه‌ك به‌ یه‌ك دڵ به‌ سه‌د دڵ حه‌یرانی ده‌بێت، كاتێك قسه‌ی له‌گه‌ڵ ده‌كه‌یت، زۆر به‌ ڕێكوپێكی دێته‌ ئاخاوتن، له‌ ژیانی هاوسه‌ریدا، سێجار شوویكردۆته‌وه‌، باشه‌ كه‌ ئاخاوتن‌و ئاكار و ره‌فتاری هیچ خه‌وشێكی نه‌بێت، چه‌ند سه‌یر ده‌بێت كه‌ سێجار مێرد بكاته‌وه‌، واته‌ سێجار ته‌ڵاق دراوه‌، كه‌واته‌ با بۆ خۆی ده‌رده‌كه‌یمان بۆ بگێڕێته‌وه‌ و ئێمه‌ش گوێی لێبگرین. (په‌روین) گێڕانه‌وه‌ی به‌سه‌رهاته‌كه‌ی به‌مجۆره‌ ده‌ستپێكرد و وتی: هه‌ر كه‌سێك بزانێت‌و بمناسێت كه‌ له‌م ته‌مه‌نه‌دا سێجار به‌ مێرد دراوم، سه‌ری سووڕ ده‌مێنێ، ئه‌وه‌ دوو ساڵه‌ دامه‌زراوم له‌ فه‌رمانگه‌یه‌كی حكومی، له‌ فه‌رمانگه‌كه‌ ده‌مووت مێردی سێیه‌ممه‌ ژنه‌ فه‌رمانبه‌ره‌كانیش ده‌یانووت: بێ قه‌زا بیت یه‌كێ له‌ ته‌مه‌نی تۆدا بێت چۆن سێ شوو ده‌كات؟ خۆ تۆ جارێ هه‌ر له‌ سه‌ره‌تای گه‌نجێتیدای، یان هه‌بوون كه‌ ده‌یانووت: به‌خوا گاڵته‌ ده‌كه‌ی ده‌نا، ئێمه‌ به‌ حاڵ مێردێكمان ده‌ستكه‌وتووه‌، ره‌فیقمان هه‌یه‌ ئێستاكه‌ قه‌یره‌كچه‌ و به‌جۆرێك مه‌منوونی ئه‌و خودایه‌یه‌، ئه‌وه‌ بێجگه‌ له‌و هه‌موو پرسیاره‌ ناخۆشانه‌ی كه‌ ده‌یانكرد و ده‌یانوت: بۆچی له‌ مێردی یه‌كه‌مت جیابوویته‌وه‌، به‌ مێردی دووه‌مت رازی نه‌بوویت، ئه‌ی عه‌یبی و خراپی مێردی سێیه‌مت چی بوو، باوكت چی پێتده‌وت، چۆن ته‌ڵاقت وه‌ها به‌ ئاسانی وه‌رده‌گرت، په‌یوه‌ندیت له‌گه‌ڵ مێرده‌كانت چۆن بوو...؟ ده‌یان پرسیاری دیكه‌ش كه‌ هێنده‌ی دنیایه‌ك پێیان قه‌ڵسده‌بووم، به‌ڵام چیبكه‌م خۆ هه‌ڵقوورتاندنی خه‌ڵك له‌ ژیانی تایبه‌تیت و قسه‌ ناخۆشه‌كانیان و پرسیاره‌ بێهۆیه‌كانیان له‌ هه‌موو ئان و ساتێكدا به‌رۆكت ده‌گرن. كه‌ مێردی یه‌كه‌مم كرد ته‌مه‌نم نۆزده‌ ساڵی رێكبوو، ئه‌و مێرده‌ی یه‌كه‌مم مامۆستایه‌كی ناوه‌ندی بوو، پیاوێكی تا بڵێیت نه‌رمونیان و باشبوو، حه‌وت ساڵێك له‌ من گه‌وره‌تر بوو، زۆر رێز و قه‌دری ده‌گرتم، به‌ڵام تاكه‌ خه‌وشێك كه‌ هه‌یبوو، ره‌زیلبوو، بگره‌ زۆریش ره‌زیلبوو، به‌و بوایه‌ رۆژی سێ ژه‌مه‌ ته‌نیا نان و ماست بخۆین، كه‌ هاته‌ خوازبێنیم زۆر شه‌یدام ببوو، له‌ سه‌رێكه‌وه‌ جوانبووم و له‌ سه‌رێكی تریشه‌وه‌ حه‌وت ساڵ له‌و بچووكتر بووم، ئاماده‌بوو زۆر شت بدات، به‌ مووچه‌ی مامۆستایه‌تییه‌كه‌ی‌و وتنه‌وه‌ی وانه‌ی تایبه‌تی، توانیبووی خانوویه‌ك‌و ئۆتۆمبێلێكیش بكڕێت، كه‌ هاته‌ خوازبێنیم باوكم سه‌ره‌تا خۆی قورس راگرت، هه‌ندێ داواكاری هه‌بوو، مێرده‌كه‌م پێی زۆربوو، باوكم له‌ داواكارییه‌كانی نه‌هاته‌ خواره‌وه‌، داوای سێ هه‌زار دۆلار واته‌(سی) گه‌ڵای لێكردبوو، وتبووی ئه‌مه‌ش به‌ نه‌ختی ماره‌یی ( واته‌ شیربایی) كچه‌كه‌مه‌، ئینجا خۆی چی بۆ ده‌كات، یان ناكات هه‌وه‌سی خۆیه‌تی‌و هیچ په‌یوه‌ندی به‌ منه‌وه‌ نییه‌.. مێرده‌كه‌م خۆی زۆر هێناو برد، زۆر كه‌سی تری به‌گژدا كردین، سوودی نه‌بوو، كه‌ زانی هیچ ئه‌نجامێك به‌ده‌ست ناهێنێت، ناچاربوو رازی بێت، كاتێكیش منی ماره‌كرد، له‌ یه‌ك دوو پارچه‌ زێڕی بچووك زیاتر هیچی دی بۆ نه‌كردم و ده‌یووت شیرباییه‌كه‌ت هه‌مووی به‌ سافی چووه‌ قووڕگی باوكته‌وه‌، ده‌بووایه‌ ئه‌و پێداویسته‌كانت بۆ دابین بكات، كه‌چی هه‌مووی زه‌وت كرد، كه‌ گوواستمیه‌وه‌ یه‌ك دوو قات جلوبه‌رگم زیاتر نه‌بوو، هیچ شتێكی وای بۆ نه‌كردم، به‌ بیانووی ئه‌وه‌ی ده‌بووایه‌ له‌و پاره‌یه‌ی كه‌ باوكم وه‌ریگرت بۆم بكڕدرایه‌، به‌ هه‌رحاڵ هه‌ر چه‌نده‌ سكم به‌خۆم ده‌سووتا، به‌ڵام نه‌شمكرده‌ كێشه‌ له‌ سه‌ری، چه‌ند مانگێك لای بووم كه‌چی رۆژ به‌ رۆژ له‌ كورتیم ده‌دا و لاواز ده‌بووم، چه‌ند جارێك له‌سه‌ر خه‌رجی ماڵ ناكۆكیمان له‌ نێواندا لێ په‌یدابوو، جارێكیان ماڵم به‌جێهێشت له‌به‌ر ئه‌وه‌ی له‌سه‌ر لێنانی مریشكێك كردیه‌ شه‌ڕ و ئاژاوه‌ له‌ گه‌ڵمدا و بۆڵه‌بۆڵێكی زۆری له‌گه‌ڵدا كردم و بووه‌ بێنه‌وبه‌رده‌یه‌كی زۆرمانكرد، ئه‌وه‌نده‌ی ژنی بووم قه‌ت وا به‌ توندی و به‌ ره‌قی مامه‌ڵه‌ی له‌گه‌ڵدا نه‌كردبووم.. بۆیه‌ تۆرام و چوومه‌وه‌ ماڵی باوكم.. ئه‌وه‌ی كه‌ سه‌یر بوو ئه‌وه‌بوو باوكم پشتگیری منی كردو دژی مێرده‌كه‌م وه‌ستایه‌وه‌، كاتێك كه‌ مێرده‌كه‌م دوای چوار رۆژ ئه‌وجا هاته‌ دوام مشتومڕێكی زۆری له‌گه‌ڵدا كرد و زۆر به‌ توندی ره‌تیدایه‌وه‌ و پێیوت: هه‌ڵسووكه‌وتی خۆت له‌گه‌ڵی باش ده‌كه‌ی باشه‌، ئه‌گه‌ر نا كچه‌كه‌مت ناده‌مه‌وه‌، ئیتر قسه‌یه‌ك له‌و و قسه‌یه‌ك له‌ مێرده‌كه‌م سوێندی به‌ ته‌ڵاقی خوارد و وتی: به‌ ته‌ڵاقم ئه‌گه‌ر هه‌ر ئه‌مڕۆ خۆت نه‌گه‌ڕێیته‌وه‌ ماڵه‌وه‌ ناهێڵم پێت به‌ ماڵم بكه‌وێته‌وه‌، كه‌ ئه‌م قسه‌یه‌ی كرد، باوكیشم وتی: ده‌ به‌ ته‌ڵاقم تازه‌ پێی ناكه‌وێته‌وه‌ ماڵه‌كه‌ت، ئه‌وه‌ بوو ته‌ڵاقیدام و مانگێك زیاتر بوو له‌ ماڵی باوكم بووم، كه‌ ته‌ڵاقنامه‌كه‌م بۆ هاته‌ ماڵه‌وه‌ له‌ ماڵی باوكم بووم، چاوم پڕی گریان بوو، ده‌ستم به‌ فرمێسك ڕشتن كرد، باوكیشم وتی: هیچ خه‌مت نه‌بێت، پارێزه‌رێكت بۆ ده‌گرم هه‌موو مافه‌كانت بۆ وه‌رده‌گرمه‌وه‌.. به‌ڵام ماف، چی له‌ ماف بكه‌م كاتێك من ماڵم لێ تێكچوو...!! به‌هه‌رحاڵ له‌ رێی پارێزه‌رێكه‌وه‌ له‌ دادگا داوای مافه‌كانم كرد و بژێوی و قه‌ره‌بووی ته‌ڵاق و ماره‌یی دواخراوم وه‌رگرت. (په‌روین) درێژه‌ به‌ گێڕانه‌وه‌ی چۆنییه‌تی مێرد كردنه‌كانی ده‌دات و ده‌ڵێت: به‌مجۆره‌ په‌یوه‌ندی هاوسه‌رێتیم له‌گه‌ڵ مێردی یه‌كه‌مم به‌ یه‌كجاره‌كی پچڕا و مانگێك ده‌بوو ته‌ڵاقی دابووم. به‌هۆی ناسیاوێكمانه‌وه‌ زانیمان كه‌ ژنی دووه‌می هێناوه‌ته‌وه‌، باوكم سوێندی خوارد كه‌ نابێت مانگێكی به‌سه‌ردا بچێت له‌ ڕقی ئه‌و به‌ مێردم بداته‌وه‌و شووی دووه‌مم بكه‌مه‌وه‌.. هه‌فته‌یه‌ك دوای ئه‌م قسه‌یه‌ی باوكم، ئێواره‌یه‌ك دایكم وتی سبه‌ی شه‌و ماڵی فڵانه‌ كه‌س دێنه‌ ماڵمان (مه‌به‌ستی ژنه‌كانیان بوو)، قسه‌كه‌ی دایكم راست ده‌رچوو، شه‌وی دواتر ماڵه‌كه‌ هاتن، قسه‌كه‌ره‌كه‌یان ژنێكی په‌نجا ساڵه‌ی قسه‌ زان بوو، داوای منی ده‌كرد بۆ برایه‌كی كه‌ ئه‌ندازیار بوو، به‌ڵام پیره‌ كوڕ بوو، ته‌مه‌نی (38) ساڵێك ده‌بوو، من هه‌ر ئه‌و شه‌وه‌ ره‌تم كرده‌وه‌، به‌ڵام به‌ ماڵی خوازبێنیكه‌رم نه‌وت، به‌ڵكو ته‌نیا به‌ دایكم و باوكم وت، باوكم ئه‌و شه‌وه‌ تێرو پڕی لێدام، من هه‌ر له‌سه‌ر قسه‌كه‌ خۆم سوور بووم، دایكم له‌به‌ر ئه‌و هه‌ڵوێسته‌ی من، وه‌ڵامدانه‌وه‌ی چه‌ند هه‌فته‌یه‌ك دواخست، كوڕه‌ رۆژ به‌ رۆژ ته‌نگه‌تاوتر ده‌بوو، توومه‌س ئه‌و منی دیبوو، به‌ڵام من ئه‌وم نه‌دیبوو، نازانم چۆن بوو دایكم له‌گه‌ڵیدا رێككه‌وتبوو كه‌ به‌ به‌هانه‌ی شتێكه‌وه‌ خۆی‌و دایكی و خوشكی بێنه‌ ماڵمان بۆ ئه‌وه‌ی منیش بیبینم.. به‌ هه‌رحاڵ پاش نیوه‌ڕۆیه‌ك هاتن كه‌ زانیم میوانه‌كان هاتوون، چوومه‌ مه‌تبه‌خ و چام سازكرد و بردمه‌ ژووره‌وه‌، نایشارمه‌وه‌ كه‌ چاوم به‌ كوڕه‌كه‌ كه‌وت به‌ده‌ست خۆم نه‌بوو دڵم گرتی و كه‌وته‌ دڵمه‌وه‌ ، ئیتر دواتر زانیم ئه‌وه‌یه‌ داخوازیكه‌ره‌كه‌م، هه‌ر چۆنێك هه‌م خۆم نه‌رمیم نواند و هه‌م دایكم و باوكم له‌ بن گوێچكه‌یان خوێندم‌و رازییان كردم.. كه‌ رازی بووم، له‌ زمانی دایكمه‌وه‌ زانیم كه‌ باوكم دیسان داوای نه‌ختێك (شیربایی) كردووه‌ته‌وه‌ و به‌نیازیشه‌ بۆ خۆی بگێڕێته‌وه‌، من له‌وه‌ ترسام و به‌ دایكمم وت: ئه‌گه‌ر ماره‌یی و شیرباییه‌كه‌م وه‌كو مێردی یه‌كه‌مم بخوات، ئه‌وا بڕۆ دڵنیای بكه‌وه‌ كه‌ مێردی پێناكه‌م، ئه‌و كێشه‌یه‌ هه‌شت نۆ رۆژێكی خایاند، پاشان كێشه‌كه‌ به‌وه‌ چاره‌سه‌ر كرا، كوڕه‌ وتبووی با (په‌روین) هه‌قی به‌سه‌ر ئه‌و ماره‌یی و شیرباییه‌وه‌ نه‌بێت باوكم ده‌یگێڕێته‌وه‌، ئه‌و هه‌رچییه‌كی بووێت من بۆی ده‌كه‌م.. ده‌ی باشه‌ دواجار ئه‌و كێشه‌یه‌ش چاره‌سه‌ر كرا، كابرا هه‌م باوكمی رازیكرد و هه‌م منیش، تا بڵێی گه‌نجێكی رێكوپێك و به‌رچاو و سه‌خی ته‌بیعه‌ت بوو، ساڵی یه‌كه‌می ژیانی هاوسه‌رێتیمان بێ گرفت به‌سه‌ر برد هیچ كێشه‌مان نه‌بوو، پاش ساڵه‌كه‌ دایكی داوای منداڵی ده‌كرد، ئێمه‌ش پزیشك و نه‌خۆشخانه‌ نه‌ما سه‌ردانی نه‌كه‌ین، ئاخیرییه‌كه‌ی ده‌ركه‌وت كه‌موكوڕییه‌كه‌ له‌ خۆیه‌تی، به‌ڵام مێرده‌كه‌م راستییه‌كه‌ی به‌ دایكی نه‌ده‌وت و شه‌رمی ده‌كرد بڵێت كێشه‌كه‌ له‌ خۆیدایه‌. دایكیشی رۆژ تا ئێواره‌ تیر و توانجی تێده‌گرتم و ده‌یووت: ئه‌و ژنه‌ت راسته‌ جوانه‌، به‌ڵام داری بێبه‌ریش هه‌ر بۆ بڕینه‌وه‌ باشه‌، مه‌به‌ستی ئه‌وه‌ بوو ژنم به‌سه‌ر بێنێت، من بڕیارمدا و وتم یان ماڵی خۆمان ده‌كه‌ین یانیش راستییه‌كه‌ی چۆنه‌ ئاوا به‌ دایكت ده‌ڵێم، له‌سه‌ر ئه‌م هه‌ڵوێسته‌م شه‌ڕی له‌گه‌ڵدا كردم و لێیدام.. كه‌ دایكیشی به‌شه‌ڕه‌كه‌مانی زانی وتی: له‌سه‌ر چی به‌شه‌ڕ دێن؟ - وتم مێرده‌كه‌م خه‌ریكه‌ زمانی درێژ ده‌كات و پێی له‌ قه‌ده‌ر به‌ڕه‌كه‌ی زیاتر راكێشاوه‌، دایكشی رووی قسه‌ی له‌ من كرد و وتی: له‌وه‌ی كه‌ نه‌زۆكی و منداڵت نابێت قسه‌ ناكه‌ین، هێشتا تۆ زمانت له‌سه‌ر كوڕه‌كه‌مان كه‌ تاقانه‌ی دایكی و باوكییه‌تی درێژ ده‌كه‌یت؟ وه‌عد بێت ده‌بێت ژنێكی ترت به‌سه‌ر بێنێت، ژنه‌ نه‌ ده‌یزانی ئه‌سڵی مه‌سه‌له‌ چییه‌ و نه‌ده‌زانێت هۆی شه‌ڕه‌كه‌مان چییه‌، ئه‌وجاش قسه‌م پێده‌ڵێت و قه‌رزارباریشم ده‌كاته‌وه‌.. - له‌ دڵی خۆمدا وتم: خۆ من ته‌قیم ده‌ ئیدی كاتی ئه‌وه‌یه‌ كه‌ راستییه‌كان بڵێم و وتم: ده‌گوێ بگره‌ ئامۆژن، ئه‌وه‌نده‌ به‌سه‌ر شان و باڵی كوڕه‌كه‌تدا هه‌ڵمه‌ڵێ، هۆی منداڵ نه‌بوونمان ئه‌وه‌ نه‌وه‌كو من، ئه‌گه‌ر باوه‌ڕیش ناكه‌یت وه‌ره‌ هه‌ر ئێستا ده‌چینه‌ لای پزیشك و خۆمان ده‌پشكنین و ئه‌وسا ده‌رده‌كه‌وێت كێ داری بێبه‌ره‌. كه‌ وامووت دایكی ته‌ماشایه‌كی كوڕه‌كه‌ی كرد و به‌ چاوی پرسیاره‌وه‌ تێی ڕاما، كه‌ بینی كوڕه‌كه‌ی سه‌ری له‌به‌ر خۆی ناوه‌ و قسه‌ ناكات. بۆ ئه‌وه‌ی قه‌ره‌بووی ئه‌و شكسته‌ بكاته‌وه‌ و به‌ كوڕه‌كه‌ی وت: - ئه‌گه‌ر تۆ تۆزقاڵێك پیاوه‌تیت هه‌بێت، یه‌ك چركه‌ ئه‌و ژنه‌ لای خۆت راناگریت، مادام وه‌ها بێپه‌روا و بێشه‌رم نهێنیی تۆی ئاشكرا كرد، ئیدی ئه‌ویش له‌ شه‌رما پێی لێنا و قسه‌كه‌ی دایكی به‌جێهێنا و هه‌ر له‌وێ ته‌ڵاقیدام. پاش ساڵێك دووباره‌ به‌ مێردی دامه‌وه‌، به‌ڵام ئه‌مجاره‌ گه‌نجێكی ژن مردوو بوو، كه‌ دوو منداڵی بچووكی هه‌بوو، له‌سه‌ر ئه‌و شوو كردنه‌وه‌یه‌م ده‌ستێكم شكا، به‌ باوكم ده‌وت: باشه‌ ئاخر من خزمه‌تكارم تا مێرد به‌ كه‌سێك بكه‌م وه‌كو دایه‌نی منداڵه‌كانی ته‌ماشام بكات، له‌ژێر فشار و لێدان و ئازاردان و به‌ زۆری زۆرداره‌كی، مێردم كرده‌وه‌.. كابرا ده‌تووت به‌ مووچه‌ منی كڕیووه‌ وه‌كو خزمه‌تكاری منداڵه‌كانی ته‌ماشای ده‌كردم، ژیانم له‌گه‌ڵ ئه‌و مێرده‌ هه‌ر ناخۆشی و زه‌حمه‌ت و ئازار و لێدان بوو، ئاخیرییه‌كه‌ی به‌ لێدان ده‌ریكردم و ناردمییه‌وه‌ ماڵه‌وه‌ و ته‌ڵاقیدام، له‌ مێردی دووه‌م حه‌زم نه‌ده‌كرد ته‌ڵاق بدرێم، به‌ڵام له‌وه‌ی سێیه‌م پڕ به‌ دڵ حه‌زم ده‌كرد ته‌ڵاقم بدات و له‌ ده‌ستی رزگارم بێت.. ئێستاكه‌ كه‌ باوكم ئه‌مری خوای به‌ جێهێناوه‌ و منیش فه‌رمانبه‌رم و مووچه‌م هه‌یه‌، نه‌ بیر له‌ مێردكردن ده‌كه‌مه‌وه‌ نه‌ پێویستیم به‌ هیچ هه‌یه‌ و مووچه‌كه‌م باشه‌ و به‌شم ده‌كات و دایكیشم به‌خێوده‌كه‌م و سه‌ریشم زۆر ره‌حه‌ت و ئارامه‌ و تا ماویشم جارێكیتر نه‌ك هه‌ر مێرد ناكه‌مه‌وه‌، به‌ڵكو بیریشی لێناكه‌مه‌وه‌.