(ڤاکسین)ی دژە كۆرۆنا لە ئەمەریکا تاقیكرایەوە پ‌د‌ف چاپکردن پۆستی ئەلیکترۆنی
سێ شەممە, 17 ئازار 2020 02:40

پەیمانگەی نیشتمانیی ئەمەریکا بۆ هەستیاری و نەخۆشییەکان رایگەیاند، یەکەمین پێکوتەی دژە کۆرۆنای لەسەر یەکەمین خۆبەخش تاقیکرایەوە .

خۆبەخشەکە پزیشکێکی ئافرەتی دەرمانسازە بەناوی جێنفەر هاله و تەمەنی ٤۳ ساڵه.

بڕیارە ڤاکسینەکە لە 6 هەفتەی داهاتوو لەسەر 45 کەسی پێگەیشتووی دیکە تاقی بکرێتەوە .

بەگوێرەی رۆژنامەی دەیلی مەیلی بەریتانی، سەرپەرشتیارانی پرۆسەکە دەڵێن: قۆناغی یەکەم بریتییە لە تاقیکردنەوەی پێکوتەکە و چاودێریکردنی کاریگەرییەکانی، ئەگەر ئەنجامەکان ئەرێنی بوون، دەست بە قۆناغی دووەم دەکرێت، کە بریتییە لە چڕکردنەوەی بڕ و پێکهاتەی ڤاکسینەکە .

دکتۆر ئەنتۆنی فووچی، سەرۆکی پەیمانگەی نیشتمانیی ئەمەریکا بۆ هەستیاری و نەخۆشییەکان دەڵێت: بەو تاقیکردنەوەیە یەکەمین هەنگاومان بە ئاراستەی دروستکردنی پێکوتەی دژە کۆرۆنا ناوە و قۆناغی یەکەمی پێکوتەی دژە کۆرۆنا یەکەمین و خێراترین هەنگاوە کە لە جیهاندا نراوە .

پێکوتەکە لەلایەن پەیمانگەی نیشتمانیی ئەمەریکا بۆ هەستیاری و نەخۆشییەکان و پەیمانگەی لێکۆڵینەوە تەندروستییەکان لە شاری سیاتڵ خەرجییەکانی دابینکراون و بە هاوکاری لەگەڵ کۆمپانیای دەرمانی مۆدێرنا ئامادەکراوە.